電視劇中包公請出尚方寶劍怒鍘貪官，大快人心，原來現實中擁有先斬後奏之權嘅唔係清官，而係權貴名流。特別係今日香港，有權有勢打橫行都得，就算違法，事後求其補辦手續都可以過骨，真係恨死古人。
呢，有環保團體調查發現，白泥有五口魚塘被非法填平，涉及面積超過兩公頃，據講最早係三口魚塘被填平，復被發展為水耕農場。規劃署話就話曾經執法，其實只係要求土地擁有人移走剩餘物料同埋種草，而唔係將土地恢復為魚塘，變相承認既成事實。
所謂賊佬試沙煲，既然填平三個魚塘都冇事，土地擁有人決定「添食」，順手填平埋毗鄰嘅魚塘，仲要喺完工後至入紙申請。你估規劃署點覆吖嗱？佢哋話喎，由於鄰近三個魚塘已被非法填平，導致今次申請嘅魚塘生態功能大減，所以唔會反對。環保人士就講得啱嘞，規劃署咁做明顯有包庇有勢力人士之嫌，變相鼓勵地主架空城規程序，直接填平魚塘。咁又係吖，如果呢個邏輯講得通，歷史建築物嘅業主就唔使咁頭痛，直接改建豪宅、起酒店咪得囉，反正原有歷史價值已經大減，當局冇理由反對啫，係咪。
其實，今次事件只係冰山一角咋。環保團體計過數，由九二年至舊年，后海灣一帶濕地保育區有四百宗違規發展個案，主要就係涉及非法填塘，最誇張嗰宗個案，原本三公頃嘅魚塘被發展成廿二公頃土地，當中濕地變乾地、泥地變瀝青路，令人慘不忍睹。係人都知，后海灣一帶係重要生態保護區，每年有大量候鳥棲息，如果魚塘買少見少，良好生態滅絕都似。
點解地主咁肆無忌憚？咪因為當局有法不依，執法不嚴囉。雖然非法填塘首次最高罰款五十萬元，但上述四百多宗違規個案中，只有百分之六被罰款，平均每單六萬多啲，同填平魚塘帶來嘅巨大利益無法相提並論，根本無阻嚇力可言。
一句講晒，法律如果得唔到尊重，同鼓勵犯法冇咩分別嘅咋。好似天水圍非法泥頭山咁，其實已經存在十幾年，當局等到傳媒踢爆至補鑊；又好似僭建問題，城中達官名流幾乎人人有份，幾時見過港府執正嚟做？又好似佔領之亂及黑金醜聞，明明違法，港府卻投鼠忌器，主要搞手至今逍遙法外不特止，仲要諷刺法律面前人人不平等添。
所以話，法之不行，自上犯之，香港之所以搞成今日咁亂象叢生，咪因為上樑不正下樑歪，港府帶頭破壞法治囉。繼續咁落去，唔單止魚塘買少見少，成個香港遲早玩完都似！