《明報》炒人風波愈鬧愈過癮，看在老朽眼裏，這樣的一間報館，其管理不善彰彰明甚，尤其是人事管理，可謂慘不忍睹。任何一間企業，職級有高低，各主其事，各司其職，每人安分守己，發揮自己所長就是了；然而，《明報》職工竟可以詰問總編輯：為何不是炒你而是炒佢？
老朽不禁為之噴飯，阿姐，大哥，這是僭越啊！荀子話齋：故尚賢使能，則主尊下安；貴賤有等，則令行而不流；親疏有分，則施行而不悖；長幼有序，則事業捷成而有所休。如今，《明報》每炒一次人就出現一次丟人現眼嘅風波，職工僭越，有違當今的管理之道。
古代等級森嚴，地位高低不同，其稱謂、儀式、所用器物等都有嚴格的規定。雖然話時代唔同，企業管理應有新思維，之不過點新都不能冇晒尊卑長幼次序、職級大小之別。
家陣《明報》畀人嘅印象就係雜亂無章。講真，一張報紙點會只有一支健筆、一個無可取代嘅靈魂啊！老朽在查大俠時代曾是一粒螺絲釘，眼見唔少叻人出出入入，真正不可替代嘅，恐怕只有查大俠一人而已！今次被炒的執行總編輯，既然是難得的人才，相信如此良幣，大把識貨嘅人會爭住搶喇，何用外人如此着緊？此亦可謂皇帝不急太監急矣！
仲有更好笑嘅係，容許專欄作者失驚無神開天窗，而編者加個按就話手法錯誤，要老總道歉兼收回解僱成命。唉！咁都得，這老總人工高卻連清潔阿姐嘅權限都不如，豈不着數？豈不是佔着毛坑不拉矢？
阿里巴巴主席馬雲早前為八百多名入職不到一年的新員工上了一堂名為「百阿必修課」的公開課，其中兩句是：最討厭那些天天說公司不好，還留在公司裏的人。既然理念不同，分手要狠，不寫就是，連一點一筆都慳番。一間報館搞成咁，是時候息勞歸主了！阿們！