政情：八網難逃：王威信踢波受傷 好驚「收山」
本身係元朗足球隊主席嘅元朗區議會副主席王威信（Wilson），前晚喺社交網站facebook上載咗一張輪椅照，又寫上「行都行唔到，唔會收山啩」。收山？原來前日佢同黨友踢足球聯誼賽，豈料樂極生悲，因收掣不及而傷及左腳半月板，依家喺醫院留醫，未來一、兩日要做物理治療，若情況嚴重就要開刀做手術，清除受傷嘅半月板組織，情況可大可小。
傷患纍纍 家人見慣
Wilson係波牛，不時親自下場顯吓腳法，佢話前日喺仿真草上作賽，因突然急停而收掣不及，當時已聽到「啪」一聲，真係行都行唔到。入院經醫生診斷後，指佢半月板受傷，暫時未能如常走路，而佢已作最壞打算，就係半年內都唔敢踢波。
佢又話大約十年前右腳已做過半月板手術，諗唔到今次輪到左腳，但佢笑言家人對咁嘅情況已習以為常，因為平日練習經常損手爛腳回家，早前亦因舊患復發而休息咗兩個月。