政情：宿舍「陰影」 楊紫芝怕咗食肝
港大何東夫人紀念堂昨晚舉辦六十五周年晚宴，近二百新舊校友出席，包括港大醫學院內科學系榮休教授楊紫芝同著名導演張婉婷等。楊紫芝大談當年寄宿何東宿舍嘅經歷，佢透露當年舍監係婦科醫生，非常注重學生健康，又怕女生貧血，故每星期總有一餐安排豬肝或牛肝，所以佢依家最怕食豬肝牛肝。
楊紫芝話佢最初入港大時未有何東宿舍，其後何東宿舍一開就搬入去住，笑言因為大家只玩新生，而佢當時已經係高班故避過一劫，不過當年玩新生都係好斯文，只係請食飯、講古仔或者「唔畀入房」而已。
張婉婷就難忘當年宿舍「搶gong」情景，用熱水射向其他宿舍學生，最後多人跣倒要入院縫針，地板亦被熱水破壞翹起，佢哋要用腳踏足全晚，「踏番好」啲地板，後來「搶gong」亦因此改為喺草地進行。