政情：長毛潑墨獲放生 立會留後患
社民連立法會議員梁國雄（長毛）喺上月十一日財務委員會會議上向主席台潑墨，部分秘書處職員制服、個人物品及會議室地氈畀墨水整污糟，財委會代主席陳鑑林（橄欖）亦有中招。立法會行政管理委員會上星期向長毛發信警告，並向佢追討四千八百元，作為清洗或更換被弄污物品費用。橄欖亦有要求行管會報警或透過司法程序處理，但行管會尋日開會後，決定唔會報警，叫橄欖有需要自己報喎，據聞連部分建制派都唔同意要報警添！
冇考慮涉事職員意見
行管會尋日開會討論長毛潑墨事件，據聞好快就決定唔會報警，有建制派委員仲話「難得咁快就傾完」。據了解，行管會唔就長毛潑墨報警，原因包括件事已發生咗一段時間，行管會係關注職員安全，而唔係議員安全，認為除非橄欖自己報警，否則唔適宜以行管會名義報警，加上橄欖曾表示自己「一啲都唔驚」，所以更冇理據報警，但長毛仍需喺兩星期內磅水。
據悉，有建制派委員直言長毛今次攻擊性唔太強，認為好難介入，更指如果不滿長毛操守，應該由選民投票決定，但強調有人受傷就一定會報警。但亦有委員擔心此例一開，會縱容長毛變本加厲。有委員承認，會前立法會冇問過涉事職員有冇追究打算，咁唔問又點知職員安全係咪受影響呢？同埋有職員被潑中墨，咁都唔算係受傷？唔通要見血先算？
橄欖斥決定不負責任
橄欖知悉行管會決定後，批評行管會不負責任，唔應該叫議員本人「有問題就自己去告」，認為既然行管會追討長毛四千八百元，就應該進一步報警正視，唔應該「當睇唔到」。但被問到佢會唔會自行報警，佢坦言唔容易，話報警需要充分證據，需要行管會願意提供當日所有資料作支援。
老實講，行管會放生長毛，可以肯定長毛更加有恃無恐，繼續玩落去，若果橄欖真係報警嘅話，長毛有可能搵晒當日在場嘅議員同職員做證人，咁就真係玩番自己，換言之，放唔放生都冇好結果。