中環出更：為做義工 陳恒鑌校園賣手機
做義工要出錢又出力！立法會議員陳恒鑌（Ben）可以話係其中一個代表，佢出席全港義工服務日啟動禮時，提到自己讀科技大學時，開始喺荃灣做義工，由清水灣走到新界西咁遙遠嘅距離，都要相當多毅力同誠意，而車費對於學生嚟講亦都唔平，為咗籌夠錢，佢不惜做副業賣電話賺錢添！
阿Ben話以前多數一落堂就唔見人，開初同學仲誤會佢顧住拍拖識女仔，後來先明白佢去做義工，而為咗賺少少盤川畀車費，以及完成義工活動後，有錢同朋友食吓嘢，佢就成為第一代校園手機trade-in商人，所以佢至今對電話都好熟悉，仲不時同新社聯理事長陳勇嘅太太交流意見，睇吓買邊部電話畀陳勇用。
陳勇教路 搞手要識包底
陳勇就話搞活動要有好周詳嘅計劃，又自爆曾經甩轆。話說有個婆婆自己行開走失咗，好彩活動一開始前，佢已經教定班長者，有事要報警，結果嗰個婆婆坐警車返屋企。陳勇話幫手搞活動嘅，大部分都係義工，好難怪對方有冇數漏人，所以搞手最緊要識點包底，做足準備工夫。同場仲見到另一名立法會議員黃國健，佢呼籲多啲市民加入義工行列。
咁香港義工聯盟常務副主席馬浩文有乜經歷呢？佢話試過遇到長者唔係好想傾偈，破冰嘅秘訣係要多關心佢哋，例如天氣凍或潮濕時，關心佢哋嘅小毛病，長者就會肯傾多兩句。
另一名副主席蔡加讚話會落手落腳做義工，例如織冷衫，不過就自爆仲未學識，要婆婆教番佢喎。啲婆婆仲會教佢唔好縱容小朋友，但佢就話個女得一歲幾，唔鬧得呀！嘩，廿四孝老竇喎！
卓妮