俗語話，衰開有條路。曾經風光一時嘅國泰航空公司，近年服務水準不斷下降，各項排名跌跌不休，簡直係頭頭碰着黑。
嗱，有國際機構調查顯示，國泰航空失去連續兩年最受打工仔及求職者歡迎企業嘅冠軍寶座，今年僅得到「梗頸四」，連三甲都不入；而其全資擁有嘅附屬公司港龍航空排名更由第五位暴跌至十三位，簡直慘不忍睹。反而中電、港鐵及海洋公園就分別升上頭三位，呢啲咪就係有人歡喜有人愁囉。
有因必有果，國泰淪落到咁嘅地步，一啲都唔出奇。係人都知，國泰管理問題多多，服務質素每況愈下，加上勞資糾紛不斷，員工郁吓就按章工作，郁吓就示威抗議，亂過亂世佳人，排名點可能唔跌吖。今次調查其中一個重點係「良好工作與生活平衡」，近年國泰為咗慳皮，一味諗縮數，甚至不惜向機師開刀，一度企圖將長途航線執勤嘅機師由四人減至三人，結果引起機師群起抗議，管理層至死死氣承諾檢討。國泰管理層為富不仁，員工被榨乾榨盡，仲講咩「良好工作與生活平衡」吖。
正所謂，有諸內必形諸外，國泰內部管理混亂，服務自然唔會好得去邊，航班延誤早就成為家常便飯。呢，話口未完又嚟喇，尋日一班由香港飛往倫敦嘅國泰航機，中途因引擎油壓信號問題需轉飛重慶，行程延誤十幾個小時不特止，職員居然冇提供任何協助，二百幾名乘客喺機上苦等三粒鐘至可以落機，搞到怨聲載道。除咗航班延誤無日無之，國泰航機仲經常上演九霄驚魂添，淨係最近半個月已經發生兩宗機艙有燒焦味嘅事故，其中一班要緊急折返，話就話有驚無險，但乘客飽食驚風散，都咪話唔恐怖。
正所謂，一衰俱衰，國泰烏龍百出，港龍航空亦唔好得幾多。月初一班由海南三亞飛返香港嘅航班突然取消，港龍居然冇及時通知乘客，害到好多乘客白行一趟機場，你話係咪靠害吖？國泰同港龍好似難兄難弟咁，唔怪得好多人見過鬼怕黑，話以後唔會再幫襯呢兩間航空公司喇。
一葉知秋，國泰盛極而衰，正正係香港不斷沉淪嘅縮影，連曾經排名世界第一嘅赤鱲角機場亦烏龍百出，有時甚至好似無掩雞籠，日前一名無登機證嘅少女竟然可以大搖大擺直入禁區，臨到登機至被發現，問你怕未。
講到底，國泰之所以搞成今日咁，都係因為故步自封，不思進取，正如成個香港社會咁，一味食老本，加上內鬥內耗，想有運行都幾難！