標準工時委員會六名勞方代表去年底離場，杯葛會方輕率作出毋須為標時立法嘅建議後，一直拒絕重返開會。委員會主席梁智鴻（金刀梁）尋日出席電台節目時就放軟身段話，歡迎勞工界另起爐灶自行就標準工時問題做諮詢及撰寫報告，但希望勞方嗰份報告可以交畀委員會，再納入整體報告先交畀政府喎！金刀梁真係唔化，委員會勞方代表之一嘅工聯會理事長吳秋北都講咗好多次，除非委員會遵守曾經達成為標時立法嘅共識，否則就唔返去開會，人哋又點會將報告交畀你呢？
