政情：容海恩工作忙 冷落情郎
大律師容海恩（Eunice）加入新民黨之後，經常出席城中大小活動及落區，唔只律師樓生意少咗，連拍拖都無時間。蜜運中嘅Eunice笑言，依家名副其實係談柏拉圖式戀愛，與男友靠精神上互相支持喎！
情歸專資會成員
Eunice話，雖然密集蒲頭令佢知名度高咗，但係大狀生意冇因此好咗，反而因為太忙而唔敢亂接新案件，不過律師樓燈油火蠟同人工樣樣都係錢。新民黨算係半個「富貴黨」，據聞唔少有心參政嘅黨員可獲黨「泵水」幫補，不過Eunice強調乜「水」都冇，全部都係用緊自己錢咁話。
搵少咗真銀事小，冷落男友事大，唔知Eunice被邊個「封盤」呢？Eunice就封口，只肯透露對方係專業及資深行政人員協會成員喎！