中環出更：板腦備講稿 環保「亮」點 高永文仲用緊紙
中文大學尋日假將軍澳一個商場舉辦環保嘉年華，香港賽馬會慈善及社區事務執行總監張亮、中大副校長霍泰輝及極地博物館基金創辦人李樂詩等人都有出席。講起環保生活，張亮身體力行，佢自爆三年前就開始茹素，亦經常帶家中兩名小朋友接觸大自然，例如去大埔滘睇螢火蟲。卓妮見佢致詞時直接對住平板電腦讀稿，連紙張都慳埋，真係夠晒環保。相比之下，同場嘅食物及衞生局局長高永文仍然用紙準備講稿，難怪佢自嘲唔係環保專家喇！
除咗飲食及生活態度夠環保，張亮亦好熱愛運動，前幾年曾經參加世界四大極地之一戈壁沙漠超級馬拉松賽事，用七日時間跑足二百五十公里。張亮話過往曾有參賽者喪生，依家諗起都覺得危險。不過今次經驗改變咗佢一生，事關佢跑完之後就放棄金融工作，全力投身社企。
霍泰輝讀醫 睇唔明教授手字
同樣熱愛跑步嘅仲有霍泰輝醫生，佢話做醫生最緊要保持身體健康，所以跑馬拉松都跑咗十幾年。講起行醫多年嘅趣聞，霍泰輝話，記得當年佢跟嘅教授手寫字體十分潦草，佢成日睇唔明而要向師兄或同學求救。
有一次有位同學跟進教授嘅病人時，完全睇唔明教授寫嘅診斷結果及藥單，後來索性模仿教授筆迹照抄一份，估唔到配藥人員竟然睇得明，真係搞笑。霍泰輝笑笑口話，好彩時代唔同咗，今時今日嘅醫院講求系統化及電腦化，相信唔會再出現咁驚險嘅事。
尋日活動主題係氣候變化及生物多樣性，高永文自爆熱愛觀鳥，所以保持生物嘅多樣性對佢好重要喎！
卓妮