香港一向以法治社會自詡，話就話一切依法辦事，可惜事實啱啱相反，近年黑惡勢力無法無天，港產官僚無知無覺，搞到香港好似荷里活電影嘅葛咸城咁，簡直生人勿近。
唔係誇張（口架），淨係睇吓「貼招黨」愈來愈猖獗，就知道香港幾咁烏煙瘴氣。呢，繼多名城中富豪被黑幫貼街招恐嚇勒索之後，女明星張栢芝亦捲入「街招事件」，佢嘅經理人證實收到恐嚇電話，對方粗口爛舌，聲稱栢芝欠佢哋三千二百萬元，威脅要周圍貼街招，仲話電視台同報刊見喎。
咁仲成世界嘅？如果真係有人欠債，對方大可以透過法律途徑追討，點可以用呢啲抹黑及恐嚇手段（口架）。經理人透露，張栢芝已透過律師到警署備案，以保障人身安全，律師亦要求警方盡快搵出幕後黑手。
冇錯嘞，面對邪惡勢力，絕對唔可以妥協，近年貼招黨之所以有恃無恐，變本加厲，就係因為港府姑息養奸。好似黑幫和勝和前坐館「上海仔」咁吖，近年被指利用南亞假難民不斷喺全港各區貼街招，循環抹黑勒索最少五名港澳富豪，而警方居然束手無策，有時就算扣查貼街招者，最後亦輕輕放過，搞到黑幫愈來愈猖獗，連藝人都唔放過，再咁落去，「港人治港」遲早變成「黑幫治港」都似。
咪以為呢啲係小事吖，法律界人士指出，如果有人以貼街招作為恐嚇及勒索嘅手段，隨時干犯串謀勒索罪，最高可以判囚十四年（口架）。話時話，黑幫貼街招勒索富豪呢單嘢已經成年咁耐，警方查到依家仲係石沉大海，無聲無息，唔通又係不了了之？當局任由黑幫橫行霸道，無法無天，唔通真係要等到連高官都被貼街招抹黑勒索，當局至肯出手做嘢？
事實證明，官僚無能，足以禍港殃民。有人形容港府「萬無」，一啲都冇講錯（口架），對佔中行動無奈，對旺角暴亂無能，對南亞假難民無符，對貼招黨無計，甚至連救火都無水，港產官僚無知無覺無靈魂，唔係「萬無」又係乜吖？人哋「萬無一失」，港府就「萬無一得」，唔怪得有元朗居民建議組織「更練團」自保喇，旨意港府打擊罪案，維持治安，不如自求多福好過。
都係古人講得啱，國之將亡，必有妖孽。港府無能早就唔係新聞，最離譜係警匪一家，有警方高層被指包庇黑幫，搞到香港淪為罪惡之城。喺荷里活電影入面，葛咸城有超人除暴安良，扶弱鋤強，伸張正義，而香港冇超人打救不特止，連執法者亦同黑幫蛇鼠一窩，有乜法子唔七國咁亂吖。所以話，香港沉淪唔係冇原因（口架）！