政情：Ladies Night嚇窒酒吧 周一鑊累街坊
有娛樂場所因舉辦「Ladies Night（女士之夜）」，畀男顧客喺平等機會委員會協助下，控告違反《性別歧視條例》獲判勝訴。深水埗區議員李梓敬為挑戰平機會，尋晚大搞Ladies Night，點知間酒吧疑似怕要負上法律責任，臨時唔肯提供場地！
李梓敬臨時無場地焗取消
身兼自由黨青年團主席嘅李梓敬話，一早已向酒吧預訂場地，講明搞Ladies Night，直至尋日四點半先收到酒吧通知，表明唔想提供場地，懷疑係怕要負上法律責任，亦唔排除平機會曾向酒吧施壓，佢對事件感到遺憾。佢之後嘗試另覓場地但唔成功，只好臨時取消活動。
青年團副主席李鎮強就批評，事件係平機會前主席周一嶽埋下嘅炸彈，唔排除會對平機會再下戰書。咁啱「蘭桂坊之父」盛智文路經酒吧樓下，佢批評判決錯誤，認為Ladies Night只係商業決定。