政情：熱愛運動 李惠森周身傷
李錦記家族最近捐贈哈佛大學成立咗一間健康與快樂研究中心，探索可以抵禦某啲疾病嘅心理、社會同情感因素及正能量。講起點樣維持快樂心情，李錦記健康產品集團主席兼行政總裁李惠森就話自己最鍾意做運動，仲有個稱號叫做「容易受傷的男人」，事關佢全身手手腳腳都幾乎受過傷咁滯。
膊頭鑲螺絲 照挑戰難度
李惠森話，好多人試過做運動受傷後就會轉玩另一種運動，而佢就相反好鍾意挑戰難度，除咗熱愛滑雪、踢波、打高爾夫球兼每日行一萬步外，近期仲愛上直升機滑雪，夠晒刺激。佢仲透露，左邊膊頭傷過四次，依家仲有螺絲喺入面，右手拇指同尾指及兩邊膝蓋亦受過傷，但依然不減對運動嘅熱愛。
聽聞佢哋家族有個規條係要早婚、唔離婚亦唔可以有第二個太太，李惠森就話第三及第四代家族成員都成功遵守，而夫妻關係穩定除咗令佢哋少咗顧慮外，仲笑言有呢個規則太太一定最開心。