政情：創科副局長 冇磚頭揸手
上月初上任嘅創新及科技局副局長鍾偉強（David）最近向局方申報利益，結果名下無物業、無投資，亦無政黨背景或政治聯繫。David學歷背景唔錯，而且未入創科局之前出任數碼港技術總監，斷估唔會係「一窮二白」之輩，但竟然係「無殼蝸牛」，唔通佢奉行「現金為王」，寧願手揸大量現金都唔想買樓？
名副其實IT人
David名副其實係IT人，連參與嘅機構組織都同佢嘅專業有關，包括香港電腦學會及IEEE電腦學會會員，同時係香港專業及資深行政人員協會、城大工程博士生會及城大資深校友組織「城賢滙」會員。至於佢太太就係家庭主婦。
相比之下，早前申報有兩個物業嘅政治助理梁淑寶似乎富貴啲，佢除咗與父兄共同持有港島南區一個自住物業之外，佢丈夫亦有一個位於美國加州三藩市嘅住宅單位。