政情：議員跟風 嘥嘥嘥
立法會議員每年都可以向立法會申請發還工作開支，唔計酬酢及交通開支，單係可申領嘅辦事處營運開支每年就超過二百三十八萬元，夠買半個細單位。過往唔少議員都被踢爆疑濫用公帑印製宣傳品，但班議員不但未有收斂，仲想放寬申領指引。有關指引其中一個檢討建議，就係將過往只有農曆新年時印製利是封、揮春等可申領開支嘅規定，放寬至其他節日都可以申領開支印製宣傳品。檢討一旦通過，恐怕議員會變超級「大花筒」！
有利曝光率 唔派就笨
本報曾報道有唔少議員豪使公帑印製宣傳品及購買電子產品，好似范國威及陳恒鑌就曾被揭豪花公帑印月曆、利是封、環保袋等，而黃碧雲亦被發現喺兩個月內買咗兩部智能手機及一部手提電腦。根據議員酬金及工作開支償還款額小組委員會檢討申領開支指引嘅文件，當中列出多項建議，包括喺宣傳品方面，就放寬至凡與節日相關嘅宣傳品，只要包含議員姓名及聯絡資料都可以申請發還開支，唔再局限喺農曆新年，即係中秋節派得、聖誕節又派得，真係訂製多多宣傳品都無有怕。
過去指引亦規定，議員唔應該以公帑去支付選舉相關活動，但新建議就指出，如選民登記相關宣傳品不帶有政治傾向，亦唔用作呼籲支持某政黨或人士，就唔會被當作選舉相關活動，換言之同選民登記相關嘅宣傳品亦可以申領公帑補貼，對議員嚟講，唔派就笨，執輸行頭慘過敗家。
家具設備 三千蚊以下唔使還
喺資本項目方面，對於現時價值一千蚊以上而可用多於一年嘅設備、家具，如議員已獲發還開支，卸任時就需交還秘書處，新建議就將資本項目價值下限調高到三千或五千蚊，即少於三千蚊嘅項目就毋須交還。至於唔少議員熱衷購買嘅電子產品，過往議員卸任時可根據秘書處釐定嘅市價回購，新指引就會參考區議會按購入年期計算折舊率，再畀議員回購。小組委員會會喺下周一討論有關建議，如獲通過下屆立法會就開始生效。