中環出更：肥老闆嘆四年任期 渾渾噩噩
今屆立法會會期踏入尾聲，部分議員已經開始總結過去四年工作。回顧四年立法會生涯，金融服務界議員張華峰（肥老闆）竟然大嘆渾渾噩噩就過咗，仲預計下屆立法會只會更差，暫時未見到出路喎。點解肥老闆咁灰心呢？佢話業界有不少訴求，例如應用金融科技促進業界發展、促請證監會容許網上認證開戶等，奈何幾年間都爭取唔到一啲成績，仲話可能同業界唔夠激有關。
畀拉布累股市損手
肥老闆話，業界成日要睇住個市，無可能放低手上工作走去遊行、示威，甚至佔領港交所，因而令人覺得業界聲音唔夠強。既然係咁，肥老闆會唔會變得更激進呢？他就笑笑口話，自己惡唔出樣，業界講咗好耐嘅罷市五分鐘抗議亦未能成事。
講開股市，肥老闆話近期忙於應付立法會「拉布」，泛民主派經常點算開會法定人數，令佢成日要喺立法會大樓上上落落，唔可以專心睇實個股市搞到有啲損失。既然做議員渾渾噩噩，又預期下屆立法會更差，仲搞到投資損失添，唔知佢會唔會考慮放棄連任呢？
卓妮