中環出更：遇震逃生 梁世華走佬包傍身
日本九州熊本縣及南美洲厄瓜多爾等地先後發生強烈地震，卓妮早前喺活動上見到香港品牌發展局及中華廠商聯合會一班成員，佢哋不時都要到外地公幹做生意，當中唔少曾經歷過地震。品牌局總裁梁世華憶述，早幾年日本三一一大地震時佢身處東京都感到強烈震動，及後每次出門都會預備「走佬包」，佢又提示大家遇到地震應注意嘅事項。
品牌局及廠商會繼早前喺天津及台灣舉行工展會後，再為大連舉辦為期十三個月嘅「大連＋香港品牌節」，又會舉行互動體驗營、市場研究及培訓等。講起近日多個地方發生地震，梁世華話自從經歷過日本三一一大地震後，危機意識高咗，佢話日本人受過充足訓練，床頭會放定「走佬包」，內藏電筒、收音機及一樽水等，而床附近亦會放一對鞋，以便災難發生時方便着鞋逃生，避免畀玻璃碎等整傷腳阻礙逃生速度。
同場仲有廠商會會長李秀恒、副會長史立德、戴澤良、品牌局主席黃家和及副主席陳國民等。戴澤良話當年唐山大地震時佢正身處渤海，最初仲未反應得切，知道地震後立即改路線由前往北京改為折返香港。陳國民及史立德亦分別喺美國及台北遇過地震，但程度相對較低，又話近日有網民教路當遇到地震時應走入廁所躲避嘅做法頗合理，因至少有水源喎。
李秀恒想製民族特色相集
講番「大連＋香港品牌節」活動，李秀恒話「＋」號係代表正能量，指當地人特別着重衣着打扮，或可從中發掘商機，而佢最近就去咗雲南睇潑水節，熱愛攝影嘅佢仲諗住影低中國多個民族特色活動，打算集齊出本相集推廣有關文化。
卓妮