做紳士最緊要係點？梗係任何時候都應該「女士優先（Lady First）」喇。之不過咁，今後各位講呢句話時千祈要小心，事關一旦被人質疑係性別歧視，分分鐘被平機會告上法庭。
唔係嚇你，真係有類似個案。話說唔少酒吧及娛樂場所為咗宣傳吸客，都會搞「Ladies Night（女士之夜）」以免費入場或優惠價作招徠，本來係好平常嘅事情，點知平機會竟然受理及協助一名男顧客入稟控告一間酒吧涉嫌違反《性別歧視條例》，結果獲判勝訴，成為本港同類案件嘅首例。業界組織梗係唔服氣喇，認為女士之夜純屬營商手法，絕無歧視成分，炮轟平機會無理取鬧，有關判決直頭係一個笑話，揚言今後若遇到同類情況，會籌錢打官司到底。
又難怪業界咁勞氣嘅，針對不同對象提供優惠待遇係商界通行做法，全世界都係咁做，同性別歧視大纜都扯唔埋。有金牙大狀係咁講嘅，喺討論人權及歧視議題時，應該要建基於常理（common sense）之上。前刑事檢控專員江樂士講得仲白，話《性別歧視條例》雖然係維護人權嘅重要機制，但若無視常識和判斷力，浪費時間去提出如此瑣碎嘅訴訟，只會引起公眾嘅反感，希望平機會日後能基於公眾利益及案件價值去選擇申索個案咁話。
嗱嗱嗱，資深法律界人士都話平機會冇常識，平機會呢次真係擾民兼自暴其醜咯。好簡單，如果搞女士之夜都話唔得，咁酒樓推母親節特惠套餐咪又係犯法？酒店自助餐小童半價咪又係歧視？如果人人都學平機會咁，不分是非亂告一通，仲成世界嘅！
平機會就過癮吖，攞公帑打官司，打贏扮英雄，打輸亦毫髮無損，但係業界就慘咯，涉事酒吧飽受有關官司困擾，打算關門大吉。你話嘞，家陣經濟不景氣，娛樂場嘅生意本來已經陷入寒冬，平機會唔通驚失業率唔夠高？
話時話，平機會揸住雞毛當令箭，加上現時歧視條例千瘡百孔，濫告亂告多不勝數。近年就經常有人透過殘疾歧視條例濫告無辜，對守法公民造成極大困擾。平機會無事生非，郁吓就話歧視，郁吓就濫告，唔係添煩添亂又係乜嘢呀！
冇計喇，平機會本來就係政治花瓶，咪惟有無嘢夾硬搵嘢嚟做，顯示自己嘅存在價值囉。尤其係港府有眼無珠，早年居然翻閹廢官周一嶽做平機會主席，更加烏煙瘴氣，周一嶽雖然已經落台，但佢留低嘅蘇州屎仲有排執吖。