政情：公民講場：財爺生日 泛民流會贈興

早前本報講過，一班泛民主派議員喺立法會辯論財政預算案時，竟然好露骨咁吹捧財政司司長曾俊華（鬍鬚曾），話希望鬍鬚曾明年可以更上一層樓喎，不禁令人質疑鬍鬚曾係咪已經同泛民互相勾結。話口未完，鬍鬚曾尋日六十五歲生日，泛民就疑似向呢位「壽星公」送上流會大禮。話說尋日朝早立法會續會審議財政預算案，點知會議開咗三個鐘，就因為法定人數不足而流會喇，而流會前只得三個泛民議員在席，其他泛民無晒影，流會變相益咗鬍鬚曾早啲甩身開心慶祝生日！其實立法會主席曾鈺成已就預算案表決訂立死線，令泛民無後顧之憂玩盡點人數，流會都唔受影響。