政情：EQ撐婦女參政黨友倒米
立法會議員葛珮帆（EQ）尋日以民建聯（民記）婦女事務委員會主席身份，大談婦女參政存有無形障礙，因為中國傳統社會普遍認為，女性照顧屋企，好難兼顧家庭同事業。不過，EQ嘅黨友、觀塘區議員顏汶羽竟然就話，唔會支持太太參選，認真「倒米」！
「女性對屋企有較大責任」
顏汶羽話，雖然佢認同議會要有多啲女性聲音，但女性對屋企有較大責任，佢太太都係民記職員，有做地區工作，但坦言介意太太參選，成為太太參政嘅障礙。佢話自己已經十點幾放工，第二朝六點幾又要出門口，兩夫婦幾乎見唔到面，如果太太都出嚟參選，兩人真係可以分開住喇！加上兩人都做前線，會對家庭少咗承擔，屋企啲嘢點處理？
觀塘區議員柯創盛就唔係咁諗嘞，佢話太太都係做地區工作，曾大力游說太太參選區議會，只係太太話未準備好先無出戰，覺得兩公婆從政並非壞事，反而大家可以聽到不同意見，仲話會鼓勵顏汶羽放開成見，會同顏慢慢傾喎！