中環出更：張宇人畀中大生譏瞓得多
特首擔任大學校監必然制近期成為學界熱話，身兼中文大學校董嘅立法會飲食界議員張宇人（Tommy）尋日出席中大就改組校董會舉行嘅諮詢會時，就被學生要求佢表態係咪支持廢除特首校監必然制。Tommy話唔回答假設性問題，仲話年紀大、「今日唔知聽日事」。中大學生會會長周竪峰就寸爆Tommy瞓得多，「冇咁早死」嘅，即係寸Tommy曾經喺立法會開會期間瞓覺。
自言「今日唔知聽日事」
諮詢會後，包括周竪峰等十多名中大學生，繼續追問如果立法會將來討論廢除特首校監必然制，佢會唔會支持。Tommy就即刻「耍太極」，話唔會回答假設性問題，又話今屆立法會會期得番幾個月，下屆都未知自己會唔會繼續存在，仲叫學生唔好將特首校監必然制太過個人化。
周竪峰繼續追問Tommy支唔支持中大校董會成立工作小組，就特首出任中大校監進行檢討，Tommy都無再正面回應，仲突然「詛咒」自己「咁嘅年紀，今日唔知聽日事」，搞到班學生唔知好嬲定好笑，周竪峰仲即刻抽水話「你有咁充足嘅睡眠，冇咁早死」。唔知Tommy咁樣被學生寸法，會唔會嬲呢？
卓妮