中環出更：顧東華回味 留學加國追港漫
由香港浙江省同鄉會聯合會（浙聯會）主辦嘅全港性大型嘉年華「美麗浙江‧欣賞香港」，將於下周三起一連三日假維園舉行，屆時將設六個主題區，展現工藝美術、美食特產及旅遊等特色，仲有動漫遊戲區展示該省作為中國四大動漫大省嘅實力。講起動漫，身兼保良局總理嘅浙聯會秘書長顧東華自爆係漫畫迷，最難忘當年喺加拿大讀書時，每逢香港出版嘅英雄漫畫書新鮮運到時，即落唐人街搶購，睇少一期都唔得喎！
同場仲有浙聯會會長詹耀良、常務副會長陳仲尼（Rock）、副會長陸雅儀及紹興旅港同鄉會會長車弘健等人。Rock身兼今次活動籌委會主席，到時梗要帶家人入場玩，佢話最緊要天公作美，唔好落雨。
浙江幫力推家鄉工藝佳餚
負責籌備工藝美術區嘅車弘健就話，浙江係中國古代文明嘅發源地之一，故此今次特邀三十幾位大師現場表演精湛嘅傳統手工藝絕技，包括陶瓷拉坯、印石篆刻等，仲有龍泉寶劍等國家級工藝美術品於現場展出。
負責籌備美食區嘅青委主席顧偉誠及副主席王淑慈就話，無論點都好，香港人始終最鍾意食，所以現場準備咗大量美食畀市民免費試食，包括寧波湯圓及米芝蓮星級食肆嘅巧手小食，例如苔條花生同醬蘿蔔等，仲有一蚊超抵價換購金華火腿、青瓷陳年加飯酒及浙江糉等。現場亦有著名於清明節前採摘嘅明前龍井，當季於西湖採摘運送到港，鍾意茗茶之人就咪錯過喇！
卓妮