鼓勵生育、保護孕婦唔單止係世界大潮流，連古代中國都唔例外。好似南宋政府咁吖，就規定妻子妊娠期間，丈夫可以豁免各式差役。可憐今日香港人只能發思古之幽情，莫講話男士只有幾日侍產假，幫唔到大忙，唔少孕婦更加要落手落腳捱世界，萬一唔好彩喺公立醫院做護士，更隨時要「一婦當關」，命仔分分鐘凍過水！
唔係靠嚇o架，瑪麗醫院一名懷孕約三十周嘅外科護士，早排當夜更時就因為腦中風而要插喉急救，仲入埋深切治療部。咪以為呢宗係個別事件吖，護士協會最近接獲數宗懷孕護士當夜更時不適嘅求助個案，有前線甚至形容感覺被醫管局欺凌添。
面對前線護士群情洶湧，食物及衞生局局長高永文照例大耍官腔，強調每個護士身體狀況都唔同，唔會評論個別個案，又話醫管局非常重視員工健康，已豁免懷孕員工嘅高風險及夜班工作，並會要求醫管局檢視唔同聯網嘅做法係咪一致喎。
講就好聽嘞，實際又係點呢？唔少前線護士反映，懷孕護士即使獲豁免當夜更，放完產假返嚟都要追補番。咁都未算吖，如果病人要急救，而醫生又未到，護士即使大住肚都要幫病人做心肺復甦，有時甚至可能要協助病人過床。喂，呢啲粗重嘢壯漢都未必頂得住，更何況粗身大勢？難為高官仲好意思話重視員工健康，簡直係吹水唔抹嘴。
醫管局之所以逼大肚護士搵命博，講嚟講去都係因為人手不足。醫管局數字顯示，一四至一五年度全職醫生流失率係百分之四點四，已經高過對上一個年度嘅百分之三點九，而全職護士流失率更加維持喺百分之四點七嘅高位。最得人驚嘅係，隨着戰後嬰兒潮出世嘅護士陸續退休，一八至一九年度將會有三百二十名護士退休，足足比上一年度翻一番。你知喇，退休嘅大部分係資深護士，話服務質素冇影響實呃你嘅啫。
話時話，護士人手荒嘅問題講咗N咁多年，當局到底有咩應對措施？只要睇吓連孕婦都要上埋戰場，就知情況一啲都冇改善。最可惡係，前線醫生同護士一樣都係人手不足，當局居然玩大細超，一味搵護士笨。早排流感高峰期，病人逼爆急症室，食衞局急推所謂救亡五招，其中就包括要求護士撈埋醫生嗰份，幫手為病人配藥，前線唔（興）至奇。
你哋話嘞，港府施政無能，經濟民生已經無瓣掂，家陣仲要帶頭做無良僱主，攞大肚護士性命較飛，係咪離晒大譜吖。特區政府無能兼害人，唔怪得畀人叫「特衰政府」喇！