黃衞兵等人組成的新政黨「香港眾志」一出閘就大脫腳，準備不足，甩轆出醜；之不過，黃衞兵表面認衰道歉，卻依然大言炎炎，強調「願意接受公眾嚴厲的鞭策令他成長」，又話該黨會走出香港，連結國際，於世界舞台打好基礎，交出成績云云。
唔好話老朽潑冷水，「一室之不治，何以天下國家為？」一黨之不治，「香港中箭」失血失言，你估你係《獨臂刀》裏面嘅王羽咩，盤腸甩出來再塞入去，還可以獨臂大戰九百回合，殺敵若干後依然可以站住瓜老襯？睇佢為爭取重啟「政改五部曲」及「真普選」而絕食咁鬼錫身，就知道呢位「大思想家」在「傘後」政壇年輕化、本土急速崛起，再沒有「學生組織」嘅光環下，一切同情都會消退。
確實，要組黨突圍，在政治日益複雜的今天，叢林般的撕咬和弱肉強食中，接二連三犯錯的「大思想家」，顯然已經沒有擋箭牌，想「帶着矛盾組新黨」，在本土扎根也不易，更遑論「走出香港，連結國際」？
「香港眾志」嘅主席羅冠聰在一個電視節目上，亦如黃衞兵咁大言不慚，話要「爭取十年內，自決香港在二○四七年後的前途」。年輕人有理想係好事，之不過，太多幻想則會累事，「香港前途」如果憑你哋嘅幻想，甚麼「港人自決」、「香港獨立」……就可以把香港立立亂嘅社會管好，那簡直就是螞蟻在政壇泥漿摔角中，把大笨象摔倒嘅天方夜譚！你睇泛民用盡九牛二虎之力，爭取所謂「真普選」都失敗，你哋又憑乜嘢可以令「香港獨立」呢？
年輕人，唔該踏實啲，從政豈可信口開河如夢囈，動不動就嗌「獨立自決」，先搞掂自己嘅經濟自主先啦！唔好郁吓嚇鬼，叫聯合國承認香港係「獨立自主國家」，有台灣做辦，好心唔好咁幼稚戇居啦！