立法會前議員黃成智加入另一政團新思維後，早前參加立法會新界東補選，僅得一萬七千多票，慘敗而回。新思維主席狄志遠早前疑似要飛走黃成智，唔畀佢參選九月嘅立法會選舉，但有傳黃成智仍然死心不息咁周圍挖位，希望再續立會夢！
政界流傳，本身係註冊社工嘅黃成智九月冇得選新東後，一度考慮出戰社福界爭番個位，但係呢個想法就被新思維否決，佢喺冇位出選之下，想再出戰新東。據悉，新思維初步亦有其他成員有意出選，新界東有廖添誠，九龍西有姜炳耀，九龍東有黃俊瑯，新界西就會支持獨立嘅葵青區議員張慧晶，亦可能會派人出選飲食界及保險界，至於主席狄志遠，就有傳或會出選九龍西，同姜炳耀二揀一。
黃成智接受查詢時強調自己一向參加直選，冇諗過參選功能界別，至於新東方面，如果唔使佢選就最好，自己初步都欣賞廖添誠，如果對方嘅工作有具體表現，情況理想就會推薦佢，但就可能唔會排喺佢張名單後面嘞，因為兩人年紀相差頗遠，如果想團隊較年輕，要考慮加入係咪好事喎。政治一日都嫌長，究竟最終佢係咪再戰新東或另謀出路，大家拭目以待嘞！