政情：遊厄瓜多爾 「震」驚蔡菜子
厄瓜多爾日前發生七點八級地震，塌方嚴重，造成大量傷亡。原來港區全國人大代表蔡素玉（蔡菜子）都喺當地。吓！好危險喎。好彩佢越洋報平安，有驚無險。
越洋報平安 繼續行程
蔡菜子透過WhatsApp，話近日有啲朋友知佢身在厄瓜多爾，紛紛問佢有冇危險，於是佢先向大家報平安。佢又憶述遇到地震嘅經歷，話地震時佢同朋友食緊晚飯，突然感到搖晃得好厲害，大家都跑出街，喺街頭見到房屋搖動。由於佢會轉去Galapagos（加拉伯戈斯群島），喺嗰度逗留八日兼且冇WiFi或電話，所以趁失聯之前，同大家講聲先。
點解蔡菜子會身處厄瓜多爾？原來佢係去旅遊，四日前抵達當地，點都估唔到竟然會遇上地震，佢都話係有驚無險，而搭飛機去Galapagos時，喺機場仲遇到幾十名消防員，準備坐飛機去災區救援添！
雖然遇到強裂地震，但無阻蔡菜子嘅旅遊行程，佢去完Galapagos之後，就會去古巴、巴拿馬同墨西哥嘞！