政情：郭位被抹黑 退選中研院
涉及教育、學術事宜嘅人選委任均有泛政治化嘅情況出現，呢股風氣唔只喺香港出現，連台灣都唔例外，所指嘅係台灣出生嘅香港城市大學校長郭位，據報佢係台灣嘅中央研究院遴選院長嘅三名候選人之一，但結果未出爐，郭位率先發表聲明宣布退選，炮轟喺遴選過程有好多謠言，惡言抹黑，令教研機構「重選舉、輕遴選」，有分析更指今次事件涉及台灣藍營同綠營之間嘅角力，莫非泛政治化嘅風氣會好似雪球咁，繼續愈滾愈大？
台灣嘅中央研究院依家遴選緊院長，較為人熟悉嘅一名候選人係郭位，但事情峰迴路轉，郭位日前發表聲明宣布退出中研院院長遴選，批評喺遴選過程有好多謠言，惡言抹黑，令教研機構「重選舉、輕遴選」，而且只問派系立場，郭重申若然任何人循正常過程提報任命，必定支持。據台灣傳媒報道，郭位今次決定退選，或涉及藍營同綠營嘅角力，事關民進黨被指力阻郭執掌中央研究院，原因係郭嘅立場親大陸，未有積極捍衞民主言行，嚴重與台灣社會脫節。
續掌城大 管理層舒口氣
另一方面，郭位嘅退選亦標誌唔會出現辭任城大校長呢一幕，城大管理層或者可以舒一口氣，唔使頭痕搵校長繼任人。據知郭位嘅校長任期到二○一八年五月，換言之距今仍有約兩年時間，有消息指郭位早一、兩年曾考慮離任，有校內人士估計同教職員薪酬同公務員脫鈎後，改以按表現加薪嘅論功行賞方式引發不滿有關，而郭今次尋求新出路，最終同台灣嘅中研院扯上關係，一般相信同其台灣背景有關。
事實上，教育「被政治化」近年成為趨勢，如對香港教育界有認識對此都唔會陌生，先有港大法律學院前院長陳文敏被否決出任港大學術及人力資源副校長一職，而陳文敏亦冇避忌，多次高調公開發言；而較早一段時間，中大前校長李國章落實出任港大校務委員會主席前夕，校內校外均都曾掀起一輪抗爭浪潮，加上有政黨、社運人士等加入戰團疑興風作浪，由此觀之，「學術歸學術，政治歸政治」之日似乎遙遙無期嘞！