中環出更：遭改功能界別 象哥險中伏
各黨派都話要更新換代，唔少泛民同建制派嘅資深立法會議員都表明會退下火線，唔會喺九月嘅立法會選舉競逐連任。不過，連任三屆進出口界議員嘅黃定光（象哥）就睇嚟未肯言休，莫非因而招人不滿，畀人更改所屬嘅功能界別阻連任？
立法會政制事務委員會尋日開會，象哥透露上周接到選舉事務處嘅信件，指其進出口界別嘅選民資格，自動波被改為批發及零售界別。象哥激動咁話自己由盤古初開已經屬於進出口界，亦從來冇沾手過批發及零售界，唔明點解突然被改所屬嘅功能組別。
收信騰晒雞 有人阻連任？
佢就呢件事追問選舉事務處總選舉主任李柏康，但李柏康指事件唔方便喺議事堂談論，話要了解情況先再作跟進。跟住象哥就話突然收到信件「騰晒雞」，因為自己無做任何改動，所以佢已即時以隨信嘅回郵信封回覆，要求更正其選民資格。真係求人不如求己呀！
好彩象哥及時發現，否則連參選立法會進出口界嘅選舉都成問題。到底係惡作劇吖，抑或有人使橫手存心阻止象哥爭取連任呢？當局確要盡快徹查，以維持選舉公平，咪齋噏跟進。
卓妮