中環出更：賣杯麵 拓財路 余偉傑夠諗頭
經濟不景，好多人都要諗橋搵商機，勢估唔到僑界社團聯會會長余國春嘅兒子余偉傑（Andrew），當年放洋喺英國讀書時，竟然諗到賣杯麵殺出商機喎。
話說六大社團包括香港梅州聯會、香港僑界社團聯會、香港福建社團聯會、香港廣西社團總會、香港廣東社團總會，同埋香港潮屬社團總會，喺維園舉辦「賞心樂食Together」，畀市民品嘗家鄉地道美食。
Andrew話最鍾意食嘅家鄉菜係梅菜扣肉，而當年喺英國讀書時，只能靠爸爸探佢下廚先有得食。佢仲話每次都會帶十幾個杯麵返英國，更有外國同學試完後讚不絕口，佢就因此發掘咗條賣杯麵嘅財路，加價一倍都依然搶手，睇嚟Andrew讀書時已經好有生意頭腦喎。
馬浩文憂港美食現傳承危機
廣西社團總會常務副會長馬浩文同樣有生意頭腦，佢大讚本土食物，更認為可以商品化添！但佢就話香港飲食業出現傳承問題，事關港人搵錢至上搞到發展失衡，令到飲食、藝術等事業都比以前失色。佢就提醒搵錢與學位無關，反而係涉及供求問題，所以燒味師傅搵錢分分鐘比大學生仲多。
卓妮當日即場試咗肉爽而唔油膩嘅均安蒸豬，但廣東社團總會會長兼副主席廖漢輝透露，呢樣名菜差啲煮唔成。事關蒸豬需要嘅火力較大，但大會嘅電壓不足以應付，其後又發現由內地運到嘅爐具插蘇唔合乎標準，到活動開幕當日先順利解決。
廖漢輝仲為同鄉講盡好說話，大讚順德男人入得廚房，顧家又有承擔，所以搵老公最好搵順德人咁話。
卓妮