有個笑話係咁講嘅，四隻烏龜打麻雀，打打吓冇晒啤酒，叫最年輕嘅烏龜去買，點知等咗成晚都未返，當三隻烏龜開始發牢騷時，嗰隻年輕烏龜居然喺門外大叫：「你哋再咁樣，我唔去買（口架）！」大家唔好以為誇張，港產官僚嘅辦事效率同呢隻烏龜差唔得幾多嘅咋。
係咁嘅，馬灣公園第一期及挪亞方舟先後喺○七及○九年開放，第二期亦早就完成規劃，並於一一年獲得區議會支持，準備將馬灣村屋保育活化為類似中環元創方嘅餐飲及文化設施，成為本港另一個具有特色嘅旅遊景點。計劃本來幾吸引嘅，可惜地政總署拖拖拉拉，遲遲未能收回村內二十八戶寮屋官地，搞到動工遙遙無期，認真離譜。
正所謂，時間就係金錢。馬灣公園被譽為本港第三大主題公園，第二期延誤動工，除咗令本港失去一個新旅遊景點，未能串連挪亞方舟，而且導致建造費大幅飆升，由原先估計嘅三點五億元增至近五億元，超支逾四成，如果繼續拖落去仲唔止添吖。負責項目嘅發展商批評政府部門歎慢板，阻礙計劃進行，承諾只要政府交出土地，三年內就可以完成二期工程。
所以話，官僚無能，真係害人害物。中國登月工程都唔使花咁長時間喇，港府拖咗五年都未能收回區區廿幾間寮屋官地，想唔認無能都唔得咯。試諗吓，如果呢啲土地係官僚私人所有，佢哋會唔會闊佬懶理吖？
講起馬灣村嘅歷史，一啲都唔簡單（口架），尤其係漁村棚屋更充滿特色，而九龍關石碑、馬灣古代稅關遺址更加見證香港百幾年歷史，只要成功保育活化，絕對可以成為本港主要旅遊景點之一。最難得係有私人發展商出錢出力，完全唔需要動用公帑，港府咁都仲要拖拖拉拉，你話係咪抵鬧吖。
講到呢度，大家應該知道點解香港旅遊景點十年如一日，嚟嚟去去都係三幅被，完全冇新鮮感。港產官僚胡混度日，自己唔識打造新景點，連私人發展商嘅創意都扼殺埋，咁點止係捉到鹿唔識脫角，簡直就係倒米。
唔怪得香港旅遊業無以為繼，旅客人數跌跌不休，搞到迪士尼樂園都要裁員救亡，講起真係可悲。最好笑嘅係，港產官僚仲吹水唔抹嘴，話要開拓新市場，吸引高端旅客喎。咪話功夫茶唔提醒吖，家陣全世界爭相吸納中國旅客，日本、南韓等周邊地區更加積極出招，新旅遊景點一個接一個，而上海迪士尼樂園亦就快開幕，香港繼續唔嗲唔吊，遲早坐吃山崩，連穀種都冇得食吖！