政情：「細碼」周浩鼎 旅行不忘工作
離島區議員周浩鼎（Holden），自從喺二月立法會新界東補選落敗後，唔單止曝光率大為減少，連體重都隨之而下降。尋日我哋喺一個活動上見到瘦咗幾個碼嘅Holden，佢話之前太忙無時間食嘢，搞到個胃縮晒水，依家食嘢都食唔到好多，短短幾個月就輕咗十幾廿磅，唔通因為補選捱到殘？
偕家人遊星「補數」
新界東補選過咗兩個月都唔夠，點解Holden輕咗咁多呢？佢話選舉時唔得閒食飯，加上體力勞動多，所以清減咗唔少，以前買落嘅恤衫都已經唔啱着。佢又話，之前忙住搞選舉，無乜時間陪屋企人，三月時特登同老婆阿仔去新加坡旅行補數。問到旅程有咩難忘經歷，佢就話對新加坡植物園印象最深刻，認為園藝師將公園嘅植物打理得好好，園內嘅綠化工作亦好出色。雖然喺公園嘅逗留時間唔長，但佢覺得好有參考價值，睇吓適唔適合用喺離島區喎，真係去旅行都不忘工作。