政情：打工「新文化」嚇親企業家

好多人都話年輕新一代的打工文化同上一代有好大分別，家族做藥品生意嘅香港中華總商會青年委員會主席黃楚恒（Stanley）就有親身感受。佢話依家嘅年輕人着重工作生活平衡，人工反而唔係最重要。佢公司試過請一位男倉務員，返咗兩日工就消失咗，打極電話都搵唔到。後來個男仔打電話通知辭職唔做，Stanley諗住點都好啦，話要畀番兩日薪金佢，點知個男仔話唔需要喇，十足打「風流工」。