中環出更：阿基「賴死」佔議辦 棄選先肯走
工聯會「小花」陳穎欣去年撼贏身兼立法會議員嘅民協老將馮檢基（阿基），成功當選深水埗區議員，但據悉阿基敗陣後仍然想以立法會議員身份，續租該區唯一可以用作議員辦事處嘅地舖，可謂立法會議員鍾樹根被指霸住柴灣漁灣邨議辦嘅翻版，令陳穎欣一度變「無殼議員」。不過，隨着阿基棄選九龍西，陳穎欣先有機會執阿基二攤，租用靚位地舖開議辦，但仍要等待房屋署翻新後才能交吉。
「小花」陳穎欣成功執二攤
陳穎欣挾香港大學、英國倫敦大學雙學位進身區議員，加上外表清秀可人，在議會內外都稱得上係「筍盤」，但佢強調當選至今仍然單身。佢透露，年初深水埗出現專向獨行少女施襲嘅摧花狂魔，唔少街坊都叫佢出入小心啲，但事實上佢苦無護花使者照顧，仲笑言區內有婆婆比佢更加緊張自己嘅終身大事，周不時攞啲仔仔相畀佢過目，邀約一齊食餐飯「相睇」。不過，陳穎欣都笑笑口推卻，睇嚟揀個合適嘅對象仲難過打選戰喎。
卓妮