根據梅菲定律，凡係可能出錯嘅就一定會出錯。本港醫療事故五花八門，無奇不有，可能出錯嘅固然會出錯，冇可能出錯嘅亦一樣出錯，唔到你唔服。
好似聯合醫院咁吖，最近爆發連環醫療失誤，簡直匪夷所思。一名高齡孕婦接受產前超聲波檢查，至發現胎兒已經冇咗心跳，懷疑胎死腹中兩個星期都冇人知，你話醫院係咪烏龍吖？另一單仲離奇，一名女病人舊年十二月喺聯合醫院接受卵管及卵巢切除手術，兩星期後病理化驗報告顯示病人右邊卵巢有癌細胞，點知報告由化驗室電腦系統傳送到病房時居然無端端「失蹤」，醫生及病人懵然不知，直到最近覆診至知出事，前後延誤超過四個月，萬一癌細胞擴散，點算好呢？
係人都知，病向淺中醫，卵巢癌係本港婦女第六大常見癌病，每年奪去近二百條人命，延誤醫治嘅後果可大可小o架。最得人驚嘅係，呢單個案可能只係冰山一角，最少仲有兩名女病人嘅病理化驗報告未能送達病房，其中一人嘅報告更顯示患畸胎瘤添。院方話唔會影響臨床治療喎，你信唔信吖？
一如既往，公院爆大鑊，港產官僚例牌賊過興兵。食物及衞生局局長高永文聲稱院方已成立獨立委員會調查事件，預料數周後提交報告；仲話會從系統、流程及指引檢視事件，防止同類事件再發生喎。其實，正如資訊科技界嘅立法會議員話齋，辦公室早就進入無紙化年代，醫護人員大可以透過手機或其他系統及時跟進病人情況，公立醫院一成不變，家陣仲要依賴打印報告，有冇再落後啲吖。
老實講，公立醫院烏龍百出，事故不斷，市民早就見怪不怪，當局次次都話調查，次次都淪為做騷，無論提出幾多改善措施，都係掩人耳目嘅咋。就講聯合醫院吖，年前一位女醫生寫錯百幾份病理報告，引起全港嘩然，估唔到咁快又發生化驗報告「失蹤」事件，簡直係沒有最離譜，只有更離譜。
一節見則百節知，醫管局管理混亂，公共醫療系統千瘡百孔，又點止聯合醫院有問題吖。該院話就話係九龍東聯網龍頭醫院，但一直資源不足，搞到病人逼爆，前線醫護七個蓋冚十個煲，唔出事至奇喇。港府年前做咗場檢討騷，話要改善醫管局運作，結果咪又係得個吉。
始終都係嗰句，官不殺伯仁，伯仁因官而死。醫療亂象不絕如縷，講到底都係因為港府管治混亂，有人形容政府無能兼害人，真係一啲都冇誇張o架。總而言之，今時今日最好自求多福，千祈唔好有病吖！