政情：公民講場：醜聞無休止 廢鑊累同事

人稱「廢鑊」嘅平等機會委員會前主席周一嶽任內屢爆醜聞，點知啲衰嘢喺佢執包袱卸任後仍未斷尾，走咗都仲要衰多鑊，被申訴專員公署揭發佢「假傳聖旨」，老屈平機會所隸屬嘅政制及內地事務局（政制局）同意進行歧視法例檢討和立法禁止性傾向歧視研究，但其實政制局從來無話同意，廢鑊簡直係用「那渣招」誤導公眾。東窗事發後，平機會更鬼祟刪除網頁相關資料，以圖毀屍滅迹。廢鑊衰咁大單嘢，政制及內地事務局局長譚志源真係多得佢唔少，難為廢鑊尋日仲好意思出席保障性小眾權益嘅活動，當無事發生，認真厚顏。