政情：今日你上鏡：陳偉業戴金絲眼鏡變文青

現時潮流古老當時興，愈來愈多後生仔女鍾意以懷舊打扮示人，其中「文青眼鏡」係必備嘅飾物。近日我哋就見到人民力量立法會議員陳偉業（大舊）都換咗一副圓圓哋好斯文嘅金絲眼鏡，原來係舊眼鏡，十幾年無戴過喇！大舊解釋，因為早幾日唔見咗本身副方形框眼鏡，所以先搵番呢副舊眼鏡出來戴，但無戴咁多年，竟然仲睇得清楚，事關佢雙眼有老花，以前較淺嘅近視鏡片度數就啱晒喇。其實文青眼鏡都幾襯大舊，不妨可以配多一副做後備，可以學吓班後生仔做文青，緊貼潮流。