中環出更：逆市擴充 姜炳耀社企助「更生」
香港近年多咗好多社會企業，傑出青年協會日前舉行交流晚宴，讓大家分享有關社企喺香港嘅發展情況。講到社企，協會主席姜炳耀（Ben）本身亦有聘請更生人士做裝修工作，嚟緊仲諗住開多間社企咖啡店添。Ben話，近期市況麻麻哋，裝修生意都有下滑迹象，所以諗住嚟緊年中於尖沙咀開多間咖啡店發展其他業務，幫助更生人士就業。
不過，Ben話做呢類型社企最大嘅困難，係要花好多時間去同更生人士溝通交流，為防止佢哋重行舊路，就要同佢哋一齊建立健康生活模式，而佢係過來人身份就最有說服力，所以平日會花超過一半時間在這工作上。
施家殷人事管理有法
同場仲有協會前主席甄韋喬、副主席余嫿、委員張寶雯、梁裕龍及陳嘉賢、樂善堂主席施家殷、「洗樓王」創辦人王嘉源等。
有投資社企餐廳嘅施家殷話，雖然係請殘障人士做員工，但管理亦唔容易，除咗要花更多時間教佢哋工作外，原來仲一樣會有人事問題，人事小圈子真係無分年齡，即使智障員工都識得分辨邊個同事做得多或少，所以除咗要按一間正常公司嘅方式去管理，仲話最好社企內部都用「滲透」法，做得好嘅就升職，避免「空降」職員落去。
至於德國寶集團副總裁陳嘉賢就話，雖然自己未有經營社企嘅經驗，但其家族生意都有定期每年與非牟利組織如女童軍及紅十字會等合作參與不同慈善工作，履行企業社會責任，好似免費提供場地予團體舉辦活動及教長者同小朋友烹飪菜式等。
卓妮