天有不測風雲，本港尋日朝早天氣惡劣，狂風雷暴之下澤國處處，交通混亂，返工返學嘅市民狼狽不堪，怨聲載道。好多人質疑天文台，點解咁大雨只係發出黃色暴雨警告信號？
呢啲質疑唔係冇理由o架，尋日風雲變色，天文台早上六時半至姍姍來遲發出黃雨信號，其實好多地區降雨量已經達到五十毫米紅雨警告嘅標準，元朗、屯門及南區嘅雨量更超過七十毫米，導致唔少地方嚴重水浸。最大鑊嘅係，由於撞正返工返學繁忙時間，有學校保母車死火被困，要勞煩消防員逐一護送學生返學，結果大批師生遲大到，連教聯會都忍唔住批評天文台作風官僚，冇因應實際情況改發紅色暴雨警告信號。
咁又係吖，天文台墨守成規，一味齋睇數據，而教育局亦唔識靈活變通，完全冇考慮惡劣天氣下小朋友返學問題，卒之咪七國咁亂囉。有人批評港府無能兼害人，真係冇講錯o架。難為天文台仲死撐，話尋日廣泛地區暴雨未達到相關雨量值，發出任何天氣預報都以市民安全為首要考慮喎。
其實正如網民話齋，尋日好多地區雨量已經超過黃雨信號，如果天文台真係為市民尤其係學生安全着想，應該改發紅雨信號，就算降雨量未必全部地區達標，都好過學生咁狼狽吖。好話唔好聽，今次好彩冇發生嚴重意外咋，如果唔係，呢隻鑊都唔知邊個孭。
好多人諗極都唔明，今時今日科學昌明，技術先進，預測雨量及天氣唔係咁難啫，點解天文台經常搞到倒瀉籮蟹？好似早前寒潮來襲導致冰封香港咁吖，外國天氣預報機構早就預測本港溫度低見零至四度，有氣象網站更預計本港有降雪添，反觀本港天文台預測嘅溫度明顯高得多，後來至逐步降低，唔少市民大失預算，被困山上。
仲有吖，大家應該記得○六年颱風「派比安」襲港，風力強勁，連貨櫃都吹冧，澳門一早掛起八號波，而香港天文台就堅持掛三號波，結果險象環生。事後揭發，原來天文台只根據「維港之內」風速決定掛乜嘢風球，你話係咪墨守成規吖。
即係咁，天氣變幻難料，冇人敢保證天氣預測可以百分百準確，但好似天文台咁烏龍百出，進退失據，就真係少見咯。唔怪得有人話天文台預測天氣好似醉酒佬擲飛鏢，愈來愈唔準，愈來愈離譜。冇計喇，近年香港好似撞邪咁，諸事不順，加上港產官僚渾渾噩噩，胡混度日，連一場黃雨都搞到七國咁亂，唔頭頭碰着黑至奇吖！