黃衞兵組黨「香港眾志」，大言炎炎表明以十年時間，籌組比反國教及佔領運動更大規模嘅香港自決「公投」，又話由零開始累積籌碼，並爭取國際社會支持云云。
之不過，黃衞兵呢位「思想家」，除了出閘首映甩轆，創黨宣傳單張，中、英文都錯字連篇，可以用「慘不忍睹」來形容。「香港眾志」個名，據稱不是英文，是希臘與拉丁之混種，如此口味，係「大思想家」才懂欣賞，一眾市民恐怕唔知乜冬冬！
宣傳單張上把「Theses」（眾數）錯寫為「Thesis」（單數），咁都算喇，最離奇連黨內要員嘅名都搞錯，如常委舒琪竟成性感美艷女星「舒淇」，幹事王惠芬則變成「黃惠芬」，後來再改都係錯，如此不小心嘅低級錯誤，睇怕連小學雞也不如。
此外，創黨記者會舉辦放映會，又冇預計好人數，搞到當日十多個記者遭拒諸門外，阿哥，以後未計劃周詳，唔好咁快鑼鼓鐃鈸，咚咚嗆嗆，叫人來睇熱鬧啦！前世。
如此失禮死人，唔係「香港中箭」，係自己中箭吖！有論者好心叫黃衞兵等唔好一出場就陷入「文字障」，要打好中英文根基！唉！日日掛住開戶口等人捐款做大事，邊有時間進修充實自己呢？
老朽行文至此，記起書法家費新我一次酒後揮毫，書寫孟浩然的《過故人莊》，寫至「把酒話桑麻」時，一個不留神漏寫了個「話」字。旁觀者有人發出「哎喲」一聲，為費老感到可惜；哪知他不露聲色，依舊淋漓盡致地把全詩寫完，在落款時，費老補上「酒後失話」四字。一語雙關，妙趣天成，在場的人士無不拍手稱絕。黃衞兵等甩轆連連，醜態百出，或可稱為「中箭後失話」，加上開銀行戶口擸錢屢受阻，亦可謂之「失血失言」！