尋日普遍地區落暴雨，部分地區更水浸，但天文台只係發黃色暴雨警告信號，唔少學生都要冒住大雨返學，家長固然鬧爆天文台唔改發紅雨警告，教育工作者聯會（教聯）亦搶閘「抽水」，譴責天文台作風官僚，無因應實際情況改掛紅雨，要求天文台立即檢討。不過，教育專業人員協會（教協）唔知係咪被人搶咗頭啖湯而心有不甘，反指教聯譴責天文台係搵錯對象，反建議教育局可以宣布局部地區學校停課。兩大教師組織為咗場暴雨互拗譴責對象，有乜謂呢？
教協副會長、教育界立法會議員葉建源昨午發表聲明不點名反駁教聯言論，指天文台只係負責監測同預測天氣，係咪停課責任在於教育局，唔明白亦唔同意將矛頭指向天文台，教協亦冇收到教師就暴雨投訴。佢認為，係咪全面停課應該按天氣會否威脅學生安全及健康為準則，尋日問題係個別地區雨量比較嚴重，教育局可按既定指引，宣布某個或多個地區學校停課，而唔係因為個別地區情況而宣布全港停課。
其實學生冇得學習，大家都輸，教協同教聯係時候放低意氣之爭喇。