城大同理大尋日舉辦咗個有關公共管理嘅研討會，前申訴專員黎年、前保安局局長黎慶寧（Peter）與曾任商務及經濟發展局局長嘅港鐵主席馬時亨（肥亨），三位曾經於政府任職前高官同場大談公共管治，原來三位更係「同門」師兄弟。
黎年喺研討會之後「爆料」，佢同Peter、肥亨都係港大歷史系畢業，Peter同肥亨更係同班同學，Peter只修讀歷史，但肥亨就同時修讀歷史同經濟。至於黎年就係Peter同肥亨嘅師弟，比佢哋細一屆。
黎年又話，佢哋三名師兄弟都喺大學時曾被同一位教授教過，尋日同場演講都係因為呢位教授穿針引線。
不過，要數淵源，黎年同肥亨應該再深一啲，因為兩人都曾經同任職於財經事務及庫務局，前者為該局常任秘書長，後者則為局長，肥亨演講時都有提及曾經同黎年共事過。
