政情：泛民露骨 吹捧財爺疑似勾結

立法會尋日開始二讀辯論財政預算案《撥款條例草案》，公民黨（公文袋）議員郭家麒一開始發言就提到鬍鬚曾最近啲民望比個別官員高，又直言覺得鬍鬚曾有機會出戰特首選舉，雖然口講「無必要讚佢」，但明眼人都看到佢係用其他人抬高鬍鬚曾喇。他之後仲愈講愈白，話希望鬍鬚曾未來有機會升官，同時做好一份有願景嘅財政預算案。

明踩孤寒吝嗇 暗讚出色

公文袋議員陳家洛亦話，希望鬍鬚曾嘅理財政策同理念是大家都感受到，而並非賣口乖就算，要突出有何過人之處，希望透過預算案可以看到施政理念。他又話，鬍鬚曾經常話要望遠啲，希望鬍鬚曾可以離開政府，籌組班底，為香港人爭取真普選，有良好嘅施政。至於公文袋梁家傑就引用美國前總統甘迺迪名言「駐足留戀過去和現在的人注定追不上時代步伐」，叫鬍鬚曾有志參選特首就要追上時代，唔好留戀過去沾沾自喜。

除了打開口牌叫鬍鬚曾參選特首，亦有議員明踩暗讚，好似工黨李卓人就彈鬍鬚曾「孤寒吝嗇」，淨係識賣口乖、派薯片，完全無解決香港嘅問題。不過，踩完後，李卓人又讚鬍鬚曾係出色公務員，如果想更上一層樓，要表現出政治家本色，有膽識去解決香港嘅矛盾問題，仲話唔知鬍鬚曾日後嘅政治身份會唔會改變，暗示到出面呀！

一面倒力撐 隨時押錯注

民主黨劉慧卿亦讚預算案有「前瞻性籌劃」，前所未見，希望鬍鬚曾出年可以說服其他人，證明佢有長遠承擔，好似落實退休保障，更指鬍鬚曾未來可能轉換跑道添！幾位泛民議員發言暗示性十足，與以往一面倒狠批政府嘅態度有明顯分別，莫非泛民已經落重注？但小心押錯注囉！