由前學民思潮召集人黃之鋒等人組成嘅新政黨「香港眾志」出閘脫腳，早前舉行記者會，臨時就記者人數設限，又因為原定播放嘅電影未獲電檢處審批，最後未能放映，令人質疑一班學生準備不足就草草組黨，結果搞到甩晒轆。近日香港眾志又被一眾網民搶閘登記facebook（fb）專頁以及買下網站域名，向來被指「多計」嘅黃之鋒，究竟點樣同網民大鬥法呢？
話說當黃之鋒上周公布新黨中英文名稱時，有不少網民就各師各法，鬥快喺fb以「香港眾志」及「Demosisto」為名成立專頁，又有網民買下「Demosisto」域名，當中包括.com.hk、.com等，予人感覺就係想「吊高來賣」，想黃之鋒出高價買番呢啲域名。最近更有傳網民已用「香港眾志」及「Demosisto」之名成功申請商業登記，業務登記為「遊戲開發」，最新講法係連商標註冊都有人去搶閘申請。
據聞近日黃之鋒成功向fb申請藍剔，即經由fb認證嘅專頁，但域名就要真金白銀買入。佢早前透過中間人，希望回購demosisto.com域名，原本對方開價五百元，但黃之鋒一方就還價三百港元，未料懷疑因溝通問題，交易告吹。其實五百蚊仲要講價，唔似黃之鋒囉，搭兩、三次的士都冇咗啦！
卓妮