中環出更：老公賺錢 老婆行善
保良局董事會尋日舉行換屆就職典禮，莎莎控股主席郭少明（Simon）太太郭羅桂珍接棒做主席，城中各慈善團體代表同好友冒雨去撐場，Simon都帶埋家人去打氣。Simon話，雖然今年經濟好差，但誓言會全力作戰，一定要支持太太於任內創佳績。要努力賺錢支持太太做善事嘅仲有太子珠寶鐘錶主席鄧鉅明（Jimmy），事關Jimmy太太鄧宣宏雁（Emily）冧莊做總理。
Emily笑笑口叫Jimmy賺多啲，以便佢盡吓做總理嘅本分，為保良局籌多啲善款。Emily仲話，都知今年嘅市道有啲艱難，但係依然要本住香港精神，對未來充滿信心、努力向前。Jimmy聽到即搞笑話，依家開始要瞓少啲覺至得喇！同場仲有保良局副主席陳細潔、蔡李惠莉同馬清楠等人，福建社團聯會榮譽主席林樹哲嘅兒子林潞亦連任總理。馬清楠太太馬丘瀚如同兒子馬桂霆都有出席支持。
馬清楠來自慈善家族，父親馬錦明曾任保良局主席，捐款開辦多校，難怪佢對教育特別上心，仲讚保良局旗下學校嘅德育做得好。
郭太接棒 大計多多
新上任嘅郭太有好多發展大計，佢話未來工作重點將會放在培育下一代及「老有所依，殘病有望」，呢個亦係保良局嘅重點服務範疇。此外，今年董事會亦將推出「青年創業基金」，讓青年一圓創業夢想，並建立人脈網絡成為人生嘅重要資產。
卓妮