政情：親中人士「煲冬瓜」 落足笑料
喺中港矛盾不斷深化下，普通話亦成為「磨心」。身兼港區全國人大代表嘅新界社團聯會理事長陳勇話，學好普通話有助溝通，對化解誤解反而係好事。佢仲爆料話，有某位普通話十分普通嘅港區人大喺北京開會時，錯將「旅遊」講成「女友」，話香港係國際「女友中心」，建議中央支持香港發展「女友」喎，真係嚇親人。
「慢慢」講變「媽媽」講
呢啲「煲冬瓜」笑話，點止一個咁少吖！陳勇話仲有一位代表發言時，原本想叫人聽佢「慢慢」講，點知講成聽佢「媽媽」講，笑到大家碌地。
陳勇強調語言有助溝通，講錯嘢好易出事。佢仲勸喻年輕人學多幾種語言，無論喺溝通或者日後發展都有利，而佢亦好支持兩名分別讀緊小學同幼稚園嘅囡囡學多啲語言，大女除咗學英文同普通話之外，仲學埋法文添！