政情：博連任被孤立 李國麟忙挑機
新一屆立法會選舉於九月四日舉行，泛民主派最少四名資深議員事先張揚會引退結束議員生涯，另外於五區直選及多個功能界別，陸續有本土派、激進泛民身影，預料會與溫和泛民大鬥法。相比之下，現年五十七歲嘅李國麟（Joseph），出任立法會衞生服務界議員長達十二年，疑似被外界孤立甚至被無視，竟然至今連業界潛在對手都冇，而事有湊巧，Joseph忽然於此刻自稱，如果有人嫌佢年紀大，自己都願意退位讓賢，似乎有多少引蛇出洞嘅挑機格局，究竟最終會否適得其反，大家要拭目以待嘞。
兩度受挑戰均勝選
Joseph嘅議會生涯於二○○四年開始成為衞生服務界議員，一做就做咗十二年。其中建制派於二○○八年及二○一二年兩屆均有派代表「挑機」，包括於一二年第三度參選衞生服務界嘅前自由黨成員曹聖玉，但最終均係落敗收場。
現時距離九月選戰只餘下約五個月，Joseph透露，至今仍未收到任何可能對手嘅消息，又承認唔少業界人士都未必會行得好前，擔心會影響份工，但佢相信，基於呢個界別嘅歷史因素，建制派點都會派人參選。
疑鋪定後路等退休
當問及會否角逐連任，Joseph口講話要睇下有冇人支持，亦會拎住自己成績表去爭取支持，就算連任亦只會做多四年就退休；但佢轉頭又話，如果有人嫌佢年紀大希望佢讓位，佢都願意讓位喎；對於一旦連任議員失敗，Joseph疑似鋪定後路，打算教多三、四年書就退休。
其實前年違法佔領行動期間，都催生咗唔少專業界別組織，Joseph暫時唔喺選戰嘅中心圈，就好似冇乜所謂，甚至話退位讓賢都願意，正所謂「政治一日都嫌長」，如果稍後時間情況大逆轉，Joseph唔知會否後悔今日太過自我感覺良好呢？