中環出更：開fb網誌 創科局「冇新意」
港府多個政策局都有開設facebook專頁拉近同市民嘅距離，而開局不足半年嘅創新及科技局，亦喺日前開fb專頁，但專頁內大多係貼上頒獎典禮同埋局長楊偉雄出席活動嘅照片，了無新意，直至尋日又開設網誌，呢個對於主打創新科技範疇嘅創科局而言，似乎無乜創新元素。
內容沉悶冇人睇
楊偉雄喺首篇網誌，以《Wi-Fi與科技打造共享平台》為題，講述擴大免費Wi-Fi，即「Wi-Fi.HK」覆蓋範圍嘅理據，佢希望私營機構能夠參與，透過公私營合作推動香港創科與經濟發展，直言相信以免費Wi-Fi連通全城，一定能夠令香港成為亞洲首要智慧城市添！
仲記得楊偉雄曾經講過會開社交媒體帳戶但唔打算公開，而創科局副局長鍾偉強更話創科局將會開fb專頁，但就希望唔好收到「嬲嬲」嘅表情符號。其實喺fb留言嘅網民寥寥無幾，再唔搞搞新意，根本就冇人睇，等摺埋都得嘞！
卓妮