中環出更：員工苛求 女商家呻有代溝
好多人都話新世代嘅工作文化同上一代差異好大，早前卓妮喺活動上見到香港中華廠商聯合會常董李慧芬（Stella），講起讀書時期搵暑期工嘅經歷，佢仲記憶猶新，話當年以為有朋友介紹就「老奉」上身以為對方「請硬」自己，見完工就輕鬆行街，點知過咗成個星期都冇回音，決定打番電話問老闆先救番份工。
Stella話當年初出茅廬好多嘢大安旨意，淡淡定過咗一星期後都唔見老闆打嚟，以為自己出咗街聽唔到電話，於是打番電話問老闆幾時返工，老闆聽到後諗咗一諗叫佢翌日上班，後來先話番畀佢聽其實最初並冇諗住請佢，令佢非常驚訝，大嘆好彩自己夠主動咋！
李慧芬把握機會靠主動
佢又透露老闆覺得佢見工時唔出聲，唔適合做售貨員，係見佢咁主動打番轉頭先臨時改變主意，所以話年輕人搵工一定要主動，機會好多時靠自己把握。
喺當日參與活動嘅仲有草姬創辦人郭致因（Gammy）、飾品店創辦人張綺薇、青聯會董宋振菲、百本醫護控股行政總裁奚曉珠同人力資源公司大中華區高級副總裁徐玉珊等等。Gammy話平日啲商會好多都係男士為主，所以今次就聚埋一班女老闆分享女士闖蕩商界心聲，除咗工作仲順便可以講吓家庭同美容等女人終身事業。
講起新一代員工，徐玉珊話遇過有員工本來薪金約一萬二千港元，突然開價想加人工至一萬八千元，原因竟然係因為身邊朋友都係呢個薪金，但佢就認為加薪應該按表現最合理，又指當年自己實習，從未抱怨加班或工作多，一心想學嘢，所以冇嘢做仲會反問老細有冇嘢幫手，相反依家就好少有呢支歌仔唱喇！
卓妮