港府一直資助不同社區團體舉辦內地交流團，尋日民主黨（白鴿黨）立法會議員黃碧雲（一舊雲）喺立法會財務委員會上質疑，獲得民政事務局資助嘅交流團多數係建制派團體舉辦，又話民建聯（民記）過去三年獲當局資助二百四十萬元，質疑是同屬民記嘅民政事務局局長劉江華「鬆章」。結果被劉江華及民記議員李慧琼（Starry）一唱一和寸爆，反駁只係白鴿黨唔向當局申請資助。
一舊雲質疑，劉江華都係民記成員，民記三年攞二百四十萬元資助搞內地交流團，究竟佢有冇參與審批撥款，當局有冇一知道係民記申請就「鬆章」、進行利益輸送。Starry聽到就反駁話，白鴿黨都有搞呢啲交流團，一舊雲即刻聲大大話白鴿黨唔係用公帑搞嘅。Starry寸爆一舊雲話，白鴿黨都可以申請。
劉江華回應時話，佢無參與過有關資助嘅申請事宜，仲話呢啲嘢唔使佢做，重申資助計劃係公開接受申請嘅，佢哋都歡迎白鴿黨申請o架，只係白鴿黨自己唔申請之嘛。