政情：為生意 姚思榮食過生蠍子
香港中旅社副董事長姚思榮自當選旅遊界立法會議員後，駐守立法會時間多咗，少咗時間周圍飛。不過，講起七、八十年代幫中旅社開拓內地旅遊，走遍神州大地嘅姚思榮仲食勻各省市嘅特色美食，但唔係款款都咁易入口，為咗同合作夥伴打好關係，生蠍子、水魚血呢啲「特色」小食都要瞇埋眼頂硬上。
拓內地遊 北上「打招呼」
姚思榮回憶當年幫中旅社辦內地團，認為要贏對手就要喺細節着手，例如畀香港團友覺得食宿質素比對手好、出入交通順暢等，呢啲都要靠佢親力親為北上同相關單位「打招呼」。
佢笑言七、八十年代內地仲好興食野味，用白酒「過一過水」當消毒，試過去到西安，內地單位盛意拳拳宴請佢食當地名菜「生蠍子」，生蠍子浸過白酒，食客即刻用筷子夾起蠍子條尾就咁擺入口，後來又試過喺桂林飲蛇血，甚至水魚血，好彩冇事平安返港。
雖然姚思榮近年少咗番內地公幹，但佢至今依然每年上北京兩次，主要係試當地嘅新酒店。